ព្រះសីហនុ៖ សមត្ថកិច្ចបានឲ្យដឹងថាកំពុងស៊ើបអង្កេត និងស្វែងរកឃាតករបាញ់សម្លាប់បុរសជនជាតិចិនម្នាក់នៅក្នុងបន្ទប់ផ្ទះជួល នៅក្នុងបុរីBlue Sky ក្នុងភូមិ៥ ក្រុងព្រះសីហនុ ខេត្តព្រះសីហនុ កាលពីវេលាម៉ោង ៣និង៣០នាទី ថ្ងៃទី៤ ខែធ្នូ ឆ្នាំ២០២១ ។

ស្នងការនគរបាលខេត្តព្រះសីហនុ លោកឧត្តមសេនីយ៍ទោ ជួន ណារិន្ទ បានបញ្ជាក់ថា លោកកំពុងបញ្ជាកម្លាំងបើកការស្រាវជ្រាវបន្តជុំវិញករណីនេះ។

យោងតាមការពិនិត្យសាកសព នៅចំណុចទីតាំងកើតហេតុ ឃើញថាសាកសពជនរងគ្រោះគឺជាជនជាតិចិន មានឈ្មោះ JIKE MUNAI ភេទប្រុស អាយុ២១ឆ្នាំ ស្នាក់នៅមិនពិតប្រាកដ ត្រូវបានឃាតកបាញ់សម្លាប់ ដោយមានស្នាមគ្រាប់កាំភ្លើងចូលលើឆ្អឹងក្បាលជង្គង់គ្រាប់បៀមគ្រាប់១កន្លែង ស្នាមជើងខាងស្តាំ១កន្លែង បាញ់ត្រង់កន្លាក់ជង្គង់ធ្លាយភ្លៅទៅផ្នែកខាងក្រោយ និងបាញ់ចំចំហៀងក្បាលជង្គង់ខាងក្នុង ធ្លាយទៅគល់ភ្លៅខាងក្រោយ១កន្លែងទៀត ខណៈសមត្ថកិច្ចរកឃើញសំបកគ្រាប់កាំភ្លើង៣គ្រាប់ នៅចំណុចកើតហេតុផងដែរ ។

បច្ចុប្បន្នខណៈសពជនរងគ្រោះ ត្រូវបានសមត្ថកិច្ចដឹកយកមកតម្កល់ទុកនៅ មន្ទីរពេទ្យបង្អែកខេត្ត ដើម្បីរង់ចាំសាច់ញាតិមកទទួលយក។